1. Էլեկտրոնային աճուրդը կազմակերպում և իրականացնում է ՀՀ ՏԿԵՆ Պետական գույքի կառավարման կոմիտեն։

2.  Էլեկտրոնային աճուրդով պետական գույքի օտարման և վարձակալության տրամադրման գործընթացները կանոնակարգվում են «Հրապարակային սակարկությունների մասին» ՀՀ օրենքի, ՀՀ կառավարության 2023 թվականի սեպտեմբերի 28-ի թիվ 1667-Ն և այլ իրավական ակտերի պահանջների հիման վրա:

3. Աճուրդի մասին հրապարակային ծանուցումը հրապարակվում է www.e-auctions.am, www.azdarar.am, www.stateproperty.am կայքերում և զանգվածային լրատվության միջոցով։

4. Էլեկտրոնային աճուրդի մասնակից կարող են լինել ֆիզիկական և իրավաբանական անձինք, ինչպես նաև համայնքները:

5. Էլեկտրոնային աճուրդի լոտ կարող է լինել ցանկացած շարժական կամ անշարժ գույք, այդ թվում` գույքային իրավունք՝ բացառությամբ օրենքով նախատեսված դեպքերի։

6. Էլեկտրոնային աճուրդի մասնակիցների համար սահմանվում են մեկնարկային գնի նվազագույն հավելման հետևյալ չափերը՝

• լոտի մեկնարկային գնի մինչև 100.000 դրամի դեպքում նվազագույն հավելման չափը 500 դրամ է,
• լոտի մեկնարկային գնի 100.001-500.000 դրամի դեպքում` 1.000 դրամ,
• լոտի մեկնարկային գնի 500.001-1.000.000 դրամի դեպքում` 10.000 դրամ,
• լոտի մեկնարկային գնի 1.000.001-10.000.000 դրամի դեպքում` 50.000 դրամ,
• լոտի մեկնարկային գնի 10.000.000-ից ավելիի դեպքում` մեկնարկային գնի 1 %-ի չափով:

7. Էլեկտրոնային համակարգում մասնակիցների գրանցումն իրականացվում է առցանց եղանակով` նշելով՝

• ֆիզիկական անձանց դեպքում` գրանցվողի անունը, ազգանունը, անձը հաստատող փաստաթղթի համարը, ծննդյան ամսաթիվը, հեռախոսահամարը, հասցեն, քաղաքացիությունը, հանրային ծառայությունների համարանիշը, էլ-փոստի հասցեն,
• իրավաբանական անձանց դեպքում՝ կազմակերպության անվանումը, հասցեն ու հարկ վճարողի հաշվառման համարը, ինչպես նաև տնօրենի (եթե գրանցվողն այլ անձ է) անունը, ազգանունը, անձը հաստատող փաստաթղթի համարը, ծննդյան ամսաթիվը, հեռախոսահամարը, հասցեն, քաղաքացիությունը, հանրային ծառայությունների համարանիշը, էլ-փոստի հասցեն:

8. Համակարգում գրանցված անձը կարող է մասնակցել էլեկտրոնային աճուրդին սահմանված ժամկետի ավարտից առնվազն 5 րոպե առաջ նախավճար փոխանցելու դեպքում: Էլեկտրոնային աճուրդի նախավճարի չափը հաշվարկվում է հետևյալ կերպ՝

• լոտի մեկնարկային գնի մինչև 100 000 դրամի դեպքում նախավճարի չափը սահմանվում է մեկնարկային գնի 50 տոկոսի չափով,
• լոտի մեկնարկային գնի 100 001-1 000 000 դրամի դեպքում` 40 տոկոսի չափով,
• լոտի մեկնարկային գնի 1 000 001-10 000 000 դրամի դեպքում` 30 տոկոսի չափով,
• լոտի մեկնարկային գնի 10 000 001-100 000 000 դրամի դեպքում` 20 տոկոսի չափով,
• լոտի մեկնարկային գնի 100 000 001-500 000 000 դրամի դեպքում` 10 տոկոսի չափով,
• լոտի մեկնարկային գնի 500 000 001 դրամից ավելիի դեպքում` 5 տոկոսի չափով:

9. Էլեկտրոնային աճուրդին մասնակցելու համար մասնակիցը լոտի մեկնարկային գնի՝ սահմանված չափով նախավճար է սառեցնում առցանց վճարման համակարգի միջոցով։

10. Էլեկտրոնային աճուրդի ավարտին նախորդող վերջին րոպեի ընթացքում յուրաքանչյուր նոր գնային առաջարկի դեպքում աճուրդը շարունակվում է ևս 1 րոպե՝ հաշված առաջարկի ստացման պահից: Աճուրդի ընթացքում յուրաքանչյուր մասնակից իրավունք ունի ներկայացնելու նոր գնային առաջարկ, որը պետք է գերազանցի մասնակիցների կատարած նախորդ գնային առաջարկը՝ առնվազն նվազագույն հավելման չափով: Ընդ որում, մեկից ավելի լոտերը կարող են սկսվել միաժամանակ, սակայն յուրաքանչյուր հաջորդ լոտ կարող է ավարտվել նախորդ լոտի ավարտից առնվազն 1 րոպե հետո։

11. Էլեկտրոնային աճուրդի հաղթող է ճանաչվում ամենաբարձր գնային հայտ ներկայացրած մասնակիցը: Հաղթողը որոշվում է համակարգի միջոցով: Աճուրդում հաղթելու դեպքում սառեցված միջոցները փոխանցվում են գանձապետական համապատասխան հաշվեհամարին։

12. Էլեկտրոնային աճուրդի կայացման օրը հաղթող մասնակցի վերաբերյալ կազմվում է արձանագրություն և առցանց եղանակով ուղարկվում է հաղթող մասնակցին այն ստորագրելու և անհրաժեշտ փաստաթղթերը ներկայացնելու համար։

13. Հաղթող մասնակիցն արձանագրության հետ info@spm.am էլեկտրոնային հասցեով աճուրդի կազմակերպչին է ուղարկում հետևյալ փաստաթղթերը`

• ֆիզիկական անձանց համար՝ ՀՀ քաղաքացին` անձը հաստատող փաստաթղթի, փախստական անձի դեպքում՝ նույնականացման քարտի կամ ճամփորդական փաստաթղթի, իսկ օտարերկրյա քաղաքացին` անձնագրի պատճենները և թարգմանությունը,
• իրավաբանական անձանց համար՝ գրանցման և հիմնադիր փաստաթղթերի պատճենները, իսկ քաղաքացիների, իրավաբանական անձանց գործադիր մարմնի ղեկավարի և լիազորված անձանց համար՝ անձը հաստատող փաստաթղթի պատճենը,
• իրավաբանական անձանց համար նաև գրավոր հավաստում այն մասին, որ ՀՀ օրենքներով կամ դիմողի (հայտատուի) կանոնադրությամբ տվյալ գույքը տվյալ ձևով գնելու համար պետական համապատասխան մարմինների համաձայնություն չի պահանջվում կամ, որ պահանջվող համաձայնությունները ստացված են (կցելով այդ համաձայնագրերը),
• հաղթողի կողմից տրված լիազորագիրը (եթե արձանագրությունը ստորագրում է լիազորված անձը):

14. Աճուրդի հաղթող մասնակիցը պարտավոր է արձանագրությունը ստորագրելուց հետո երեք աշխատանքային օրվա ընթացքում 900013145025 գանձապետական հաշվեհամարին փոխանցել լոտի գինն ամբողջությամբ՝ հաշվանցելով նախավճարը (փոխանցումն իրականացվում է աճուրդում հաղթողի կողմից առաջարկված գնի և նախավճարի տարբերության չափով)։

15. Աճուրդի հաղթող մասնակիցը պարտավոր է արձանագրությունն ստորագրելուց հետո երեք աշխատանքային օրվա ընթացքում Գույքի արժեքի որոշման համար նախատեսված գումարը փոխանցել «Գույքի գնահատման և աճուրդի կենտրոն» ՊՈԱԿ-ի ՀՀ Ֆինանսների նախարարության գործառնական վարչության թիվ 900018002981 հաշվեհամարին՝ պարտադիր նշելով օտարվող գույքի հասցեն։

16. Վճարումները կատարելուց հետո հաղթող մասնակցի հետ կնքվում է առուվաճառքի կամ վարձակալության պայմանագիր, և իրականացվում են գույքի հանձնման-ընդունման աշխատանքներ:

17. Էլեկտրոնային աճուրդին մասնակցած, սակայն չհաղթած մասնակցի նախավճարը երեք աշխատանքային օրվա ընթացքում ապասառեցվում է։

Աճուրդի վերաբերյալ անհրաժեշտ տեղեկատվություն և տեխնիկական աջակցություն ստանալու համար զանգահարեք 011-52-39-86 հեռախոսահամարին կամ այցելեք Պետական գույքի կառավարման կոմիտե՝ ք․ Երևան, Տիգրան Մեծի 4։